LAOAG CITY – Nadismaya ti grupo a bukbuklen dagiti adda iti sektor ti transportasyon karaman dagiti driver ti jeep ken operator iti inaprubaran ni Presidente Ferdinand Marcos Jr. a programa iti baet ti krisis iti gasolina.
Kwinestyunaran ni Orlando Marquez, ti lider ti Liga ng Transportasyon at Operators sa Pilipinas wenno LTOP ti ipapaay a ‘fuel subsidy’ ti gobierno para kadagiti Public Utility Vehicles.
Maipalagip a sipud maika-15 ti agdama a bolan ket maipapaayan ti P10 a diskwento kadagiti driver iti kada litro ti gasolina iti panagpasada da.
Nupay kasta, inpetteng ni Orlando Marquez a daytoy ket saan a pulos a makaanay para iti kasapulan da aglalo ket dakkel ti nagngatoan ti presyo ti produkto a petrolyo.
Kiniddaw da ken ni Presidente Marcos a patgan na ti kalikagom da a pannakaipangato ti plete nga uray piso laeng gapu ta ti dati a P50 a pisos a krudo ket nagdoblen I presyo na iti agdama.
Mamati ni Marquez a ti piso a pakaingatoan ti plete ket katukad ti paggatang ti nayun a bagas ken taraon a maiyawid da iti bukod da a pamilya.
