LAOAG CITY – Inpasingked ti lokal a gobierno ditoy suidad ti Laoag ti panangipatungpal ti “TRASH-TO-CASH” program kas paset ti panangmodernisa ti sistema ti panangmanehar kadagiti basura.
Segun ken ni Laoag City Mayor James Bryan Alcid, paset ti direksion ti Smart City Laoag ti pannakaipasdek ti vending machine a mabalin a pagikabilan dagiti basura tapno adda maited a kuarta kadagiti mangisukat iti recyclable a basura. Panggep daytoy a mangpabileg iti disiplina kadagiti residente iti umiso a panangisina wenno panag-segregate kadagiti basura.
Innayon ti Mayor, nga adu pay ti masapul a kitaen ken adalenda para iti implementasion ti programa, nangruna iti panangkolektar kadagiti non-biodegradable a basura a masapul a maitunos iti Republic Act 9003 wenno Ecological Solid Waste Management Act.
Mainaig iti datoy, kitaen ti siudad ti pannakaipatungpal iti composting kas paset daytoy, naited idi napalabas a tawen ti compost kit iti tunggal pamilia, ken mabalin a mapalawa pay ti deployment-na no kasapulan.
Kabayatanna, ti nasao a programa ket maitunos iti panangpapigsa ti sistema ti panagkolektar ti basura ken nakitinnulong met ti Community Environment and Natural Resources Office (CENRO) ken ti Office of the City Engineer maipapan iti pannakaipasdek iti ad-adu pay a garbage ken trash bins.
