LAOAG CITY – Napaltugan ti maysa a tricycle driver a ni Elimar Salvador alyas Macky, naasawaan, taga Barangay 35, Gabu Sur ditoy ciudad ti Laoag.
Iti inisyal nga imbestigasyon, kabayatan ti panagdaldalyasat ti biktima iti nagbedngan ti Brgy. Gabu ken Brgy. Cavit ket kellaat lattan a pinaltugan dagiti dua a lallaki a naglubbon ti motorsiklo a nakatamaan ti bukot ken siket na.
Naitaray ti biktima iti Laoag City General Hospital ken iti agdama ket addan ti natalged a kasasaad.
Kabayatanna, inbatad ni Mr. Hector Raquiño iti Barangay 34-B, Gabu Sur, akinkukua ti tricycle nga ipaspasada ni Salvador nga awan ti ammo na a karirriri ti biktima gapu ta nasingpet daytoy ken membrio pay ti choir iti simbaan.
Mainaig ti daytoy, inpasingked ni Barangay Chairman Gil Ramos iti Barangay 54-B, Gabu Sur ditoy ciudad ti Laoag a nasingpet ti kaanakan na a ni Elimar Salvador ken awan pay pulos ti madi a rekord na iti barangay da.
Kuna na nga adda dagiti mangibagbaga a mabalin a ti panagal-ala da ti pasaheros iti sabali a barangay, ngem mamati a saan nga umdas a rason a pangpaltugan dagiti suspek kenkuana.
Inbatad met ni Mrs. Yolanda Salvador, ina ti biktima a ni Elimar Salvador iti Barangay 34-B, Gabu Sur ditoy ciudad ti Laoag nga awan naibagbaga ti anak na a problema na sakbay a napaltugan.
Kuna na nga awan pay ti ammo na a karirriri ti anak na isut gapuna a nakigtot no apay a pinaltugan da daytoy.
Innayon na a makaammon ti asawa ti anak na no ania ti sumaruno nga aramiden na kalpasan ti napasamak.
Kabayatanna, uray dagiti sumagmamano a kakadwa ti biktima a tricycle driver keti npasingked da a nasingpet daytoy ken awan ti ammo da a karirriri na.
Iti agdama, agtultuloy pay laeng ti imbestigasyon dagiti otoridad tapno maamoan ti motibo ken kinatao dagiti suspek.
