LAOAG CITY – Napadayawan kas Most Honest Driver ti maysa a tricycle driver ditoy siudad ti Laoag gapu iti panangisublina kadagiti napapateg a banag a nabati ti pasaherona iti luganna.
Nabigbig ti tricycle driver a ni Mr. Rodolfo Mandac kagiddan ti pannakaiyawat kenkuana dagiti tulong manipod iti lokal a gobierno ditoy siudad ti Laoag kas gunggunana iti panagbalin a pudno iti padana a tao iti baet ti kinarigat iti panagbiagda.
Naipaay kenkuana ti maysa a tray ti itlog, maysa a bag ti bagas ken cash incentive manipod ken ni Mayor Michael Marcos Keon ken ni Vice Mayor Rey Carlos Fariñas.
Kabayatanna, naammoan a saan met daytoy ti umuna a gundaway nga adda ti tricycle driver ditoy siudad ti Laoag ti napadawayan gapu iti kinapudno gapu ta addan dagiti immun-unan a naikkan ti pammigbig iti nasao a napintas nga aramid.
