LAOAG CITY – Inbilin ti Trump administration kadagiti estado iti Amerika nga isardeng da ti agbayad ti sibubukel a food aid benefits kadagiti pamilya nga Amerikano nga addaan ti nababa a mapaspastrek gapu ta dagitoy ket awan ti otoridad na.
Nailanad iti memorandum manipod iti US Department of Agriculture nga imatmatunan ti Supplemental Nutrition Assistance Program (Snap), a dagiti estados ket mabalin da laeng ti agideliber ti 65% ti food aid benefits kalpasan pinalubusan ti korte Suprema ti administrasyon a manglapped ti sumagmamano a pondo kabayatan nga iyur-uray dagiti nayun a legal a panagdengngeg.
Umabot iti nasurok nga 42 a milyon nga Amerikano ti agdepdependar iti food aid ngem partial benefits laeng ti naawat da ita a bolan gapu iti panag-shutdown ti gobierno iti Estados Unidos.
Immuna iti daytoy, sumagmamano kadagiti estado ti nangisyu ti full benefits kalpasan nga adda ti pammilin ti federal judge iti napalabas a lawas iti Trump administration nga ipaayan da ti naan-anay a pondo para iti programa.
Nupay kasta, iti inparuk-at a pammilin ti US Department of Agriculture ket inmandar na kadagiti estado nga isardeng da ti agbayad ti 100% ti benepisyo ita a bolan ti nobyembre.
Nagballaag ti US Department of Agriculture a no saan nga agtungpal dagiti estado ket makanselar aminen ti pondo da.
Ti Snap programme ket us-usaren ti maysa iti kada walo nga amerikano ken agbalor daytoy ti agarop $9-B iti kada bolan.
