LAOAG CITY – Umaboten iti 52 a boga ti nakumpiskar dagiti otoridad ditoy probinsia ti Ilocos Norte, segun ken ni
P/Lt/Col. Jephre Taccad, mangidadaulo iti Provincial Operation Management Unit iti Ilocos Norte Police Provincial Office.
Inbatadna nga umabot iti 36 a menor de edad dagiti natiliw nga agikikkot iti boga ket kaaaduan kadagitoy ket manipud iti ili Nueva Era nga umabot iti 12 ken pakairamanan iti ili ti Bacarra, Bangui, iti siudad ti Batac, Dingras, Dumalneg, Pagudpud, Pinili, Sarrat ken iti ili ti Solsona.
Kunana nga uray nagtataray dagiti nasao a menor de edad ket napaayaban dagiti nagannakda tapnu mabagbagaan dagitoy idinto no maulit ti nadakamat a banag ket agmulta dagiti nagannak da.
Innayonna a naiget ti panagmonitor dagiti kameg ti Philippine National Police ditoy probinsia para iti panagsarabo inton baro a tawen.
Mainaig iti daytoy, awan pay dagiti nairekord a nadangran gapu iti boga.
Kabayatanna, kalikagum ti Ilocos Norte Police Provincial Office a maaddaan ti “zero casualties” iti pannakausar dagiti paputok inton baro a tawen.
