LAOAG CITY – Kinumpirmaran ni Agent Manuel Sanchez, ti imbestigador iti National Bureau of Investigation (NBI) a posible a maipila ita nga aldaw wenno intono bigat ti agsusukot a kaso kontra kadagiti agasawa a natiliw iti operasyon iti Barangay 1 ditoy ciudad ti Laoag nga adda ti pakainaigan na iti panagikot ti peke nga agas.
Daytoy ket gapo ta napaneknekan a peke dagiti agas a nakumpiskar kadagitoy kalpasan ti pannakaipadalan dagitoy iti eksaminasyon babaen iti laboratoryo.
Segun kenni Sanchez, karaman kadagiti kaso a sangwen dagiti suspek ket ti panaglasing iti Trademark Law; Sec 155 in relation to section 170 iti Intellectual Property code of the Philippines ken iti Special Law on Counterfeit Medicines.
Inlawlawag ni Sanchez nga agbalor ti 3.4 a milyon a pisos ti nakumpiskar a peke nga agas pakairamanan ti Biogesic, Alaxan, Kremil-S, Medicol, Solmux, Myra E Capsule, Decolgen, Bioflu, Neozep, ken Dolfenal wenno saan nga aggapo mismo iti nadakamat a Pharmaceutical company.
Inbatad na a dagiti met non-unilab products kas iti bakuna, ampules ken dadduma pay a nakumpiskar ket urayen da ti sertipikasyon ti Food and Drug Administration (FDA) no dagitoy ket peke wenno saan.
Nagkedked metten ni Sanchez nga inaganan dagiti agasawa a suspek, ken kunana nga adda ti agserserbi nga empleado dagitoy kas iti ikit ken kabsat ti asawa a babai.
Mainaig iti daytoy, kinumpirmaran ni Sanchez nga adda pay ti imonmonitor da a kakadua dagiti suspek ditoy probinsya.
Kabayatanna, agtultuloy met ti panagaukkon ti impormasyon ti NBI no siasinno ti agsupsuplay kadagiti suspek iti peke nga agas ngem mabalin nga aggapo iti Antipolo, Manila wenno Pampanga.
Maipalagip nga idi Mayo 11, 2022, inyuswat ti NBI ti search operation iti bodega dagiti suspek a nakakumpiskaran da kadagiti nagduduma a peke nga agas.
