LAOAG CITY – Mapapati a nabartek iti agtagikua iti balay a nauram iti Brgy. 5 iti ili ti Vintar.
Daytoy ti inpakaamo ni Fire Senior Inspector Arnel Ratutia, Municipal Fire Marshall iti Bureau of Fire Protection iti nadakamat nga ili.
Segun kenkuana, nakainom ti nasanger ti akinkua ti balay idi napasamak ti uram idinto a saan daytoy a nadangran kalpasan a timmapwak manipud iti maika-dua a kadsaaran ti pagtaenganna.
Kinunana a saan a dimmalan iti medical examination ti indibidual apaman nga awan ti mangpaneknek a medical record na daytoy a maipagarup nga adda ti problema na iti utek.
Inbatadna nga iti agdama ket saan pay masinunoo no ana ti namungayan ti uram ngem mapapati a nagappo ti uram iti umuna kadsaaran iti nasao a pagtaengan.
Innayonna nga awan ti sabali a pagtaengan a nairaman iti insidente idinto a dagus a nasebseban ti uram babaen ti tulong ti Bureau of Fire Protection ti Vintar ken Baccara ken naideklara a “fire out” iti pasado alas-diyes ti rabii idi Oktubre 28.
Nammaon nga agdama nga agnanaed ti pamilia ti indibidual iti siudad ti Manila ken nakaawiden daytoyen iti lugarda.
Kabayatanna, kunana a naaramid iti light materials ti pagataengan ken agtultuloy ti panangiwayat da ti imbestigasion maipanggep iti napasamak nga insidente.
