LAOAG CITY – Inpasingked ni Barangay Chairman Rogelio Dahilig, ti Barangay Napu iti ili ti Badoc nga awan ti dakes a nakaidamdamaganna ti kabarangayanna a biktima ti pammaltog.
Segun kenkuana, addanto ti maimuntar a Close Circuit Television wenno CCTV camera iti barangayda.
Daytoy ket kalpasan ti napasamak a pammaltog a nakatayan ti maysa kadagiti kabarangayanna babaen ti saan pay a nabigbig a suspek.
Segun ken ni Kapitan Dahilig a burburtia pay laeng kadakuada no asino ti posible a nangaramid iti pannakapaltu-paltog ti biktima.
Inbatadna a binilinna dagiti padana nga opisial nga agbalin a naiget ti panagpatrolyada iti barangayda tapno awan ti makastrek nga indibidual nga adda ti dakes a panggepna.
Inlawlawagna a saanna pay a masinunuo no adda ti pakainaganna iti trabaho ti biktima iti napasamak gapu ta saanna pay a nakasarsarita a naimbag ti pamilia daytoy.
Maipalagip a natay ni Fernando Baldugo y Dahilig, agtawen ti 51, naasawaan ken residente ti Sitio Cabuan, Brgy. Napu iti ili ti Badoc kalpasan a pinaltu-paltogan ti saan pay a nabigbig a suspek.
Immuna iti daytoy, narekobre dagiti otoridad iti nakapasamakan ti krimen ti walo a kapsula ken uppat a bala ti calibre 45.
