LAOAG CITY – Respetaren ni Barangay Chairman George Ragunjan iti Barangay Caruan iti ili ti Pasuquin iti nagbalin a desisyon ti konseho iti nasao nga ili.
Daytoy ket mainaig iti panangipataw kenkuana ti konseho ti nasao nga ili ti 60-day preventive suspension.
Maipalagip a naireklamo ni Ragunjan babaen kadagiti sumagmamano a residente iti Barangay Caruan gapu iti maipagarop a panaglabsing ti kapitan iti Section 60 ti Republic Act No. 7160 ken Republic Act No. 6713 wenno ti “Code of Conduct and Ethical Standards for Public Officials and Employees” gapu iti maipagarop a panangipawil na kadagiti complainants ti panagala da ti pebbles iti nasao a barangay.
Nupay kasta, inpetteng ti kapitan a sobra unay ti panagala dagiti maseknan.
Inbaga na nga itay pay napan a lawas nga iyur-uray na ti desisyon ti konseho gapu ta idi pay laeng a plano na ti agbakasyon tapno agpaopera.
Innayon na a makaammon ti abogado na mainaig iti daytoy a banag ken inpasigurado na nga adda dagiti datos wenno dokumento nga iggem na a mangipaneknek nga awan ti linabsing na a paglintegan.
Mainaig iti daytoy, inpetteng ti kapitan nga awan ti dinawdawat na nga uray sentimo kadagiti nangireklamo kenkuana.
