LAOAG CITY – Inlawlawag ni Police Major Ryan Retotar, chief of police ti PNP-Dingras a pinagpalawag na dagiti tallo a pulis a maak-akusaran a nangkabkabil iti maysa a lalaki iti Brangay Suyo iti ili ti Dingras.
Segun kenni Retotar, basar iti palawag dagiti tallo a pulis ket nagprobokar ni Mc Donnard Saludares isut gapo na nga inarestar da ngem nagresistir.
Ummuna iti daytoy, inbatad ni Retotar a tinagbat pay ni Saludares ti lamisaan ken nabwak dagiti tattao isut gapo na a nagparesponde da kadagiti kadwa da a pulis.
Gapo iti daytoy, kunana a nagkikinnamatan pay dagiti pulis ken ni Saludares ken immuli daytoy iti alad ngem gapo iti kinabartek na ket naregreg.
Inbatad na pay nga idi tiniliw dagiti pulis ni Saludares ket inpamedical da ken positibo ti liquor test na.
Inpetteng na pay a no pudno nga aggi-inom dagiti pulis kas iti alegasyon ti kampo ni Saludares ket masapol a makaipresentar ti ebidensya wenno mapaneknekan da daytoy.
Mainaig iti daytoy, kuna ni Retotar a sapsapulen da ni Saludares tapno maalaan met ti palawag seknan iti daytoy ngem agpapan ita ket saan da pay a nakita.
Naamoana dagiti pulis ket nakaduty ngem gapo ta kabagyan da ti nagminatay ket nagpakada dagitoy kenkuana.
Kunana a napasamak ti insidente idi Hulyo 4 ken naamoan na laeng idi Hulyo 7 kalpasan a pinaayaban isuna ni Mayor Joeffrey Saguid.
Iti agdama, kunana a bayat a maim-imbestigar ti kaso ket naideposit pay laeng dagiti paltog dagiti pulis.
Kabayatanna, sumango met ti agsusukot a kaso ni Saludares pakairaman ti direct assault, panaglabsing ti Executive Order 67-20 wenno ti curfew ken liquor, illegal possesion of bladed weapon, malicious mischief, alarm and scandal, ken resistance and disobedience.
