Maipatungpal ti asynchronous class dagiti estudyante iti Mariano Marcos State University iti siudad ti Batac agingga intono bigat, Nobyembre 15 idinto a dagiti empleado ket agsubli dan iti trabaho da ita nga aldaw kalpasan ti napasamak a bomb threat idi kalman.
Daytoy ti inanunsio ni Dr. Prima Fe Franco, Officer in Charge ti nadakamat nga unibersidad kalpasan nga awan ti naduktalan a bomba ti naimula iti nasao nga unibersidad.
Segun kenkuana, dagus da nga inreport ken ni P/Col. Frederick Obar, Provincial Director ti Ilocos Norte Police Provincial Office, tapno isuda ti makikoordinar kadagiti dadduma nga uniformed personnel ken mangiwayat ti clearing operation.
Mainaig iti daytoy, nagyaman ni Franco kalpasan ti insigida a panagresponde dagiti otoridad tapno maliklikan iti ania man nga insidente dagiti estudiante ken empleado iti nadakamat nga unibersidad.
Kabayatanna, nagyaman met ni P/Col Paul Benedict Parado, Deputy Provincial Director of Operations iti Ilocos Norte Police Provincial Office iti nagbalin a tignay dagiti law enforcement, pakairamanan ti City Disaster Risk Reduction Management Office, Philippine Marines, K-9 Units, ken dadduma pay nga uniform personnel iti nasao a pagadalan.
Kinunana nga apaman nga adaa ti naawat da a report maipanggep iti nasao nga insidente ket immuna dan a nangiwayat iti panag-evacuate dagiti estudyante ken empleado no sadinno nga awan met ti nagbalin a problema a kas iti stampede ken awan ti nairekord da a naawan ti puot.
Innayonna nga insigida a nangimplementar ti lockdown ken nangisayangkat ti inspeksion kadagiti buildings ti pagadalan babaen kadagiti K-9 units tapno maammoan no ayanno dagiti ayan ti bomba.
Gapu iti daytoy, ket dagos nga inpakaammo ni P/Col. Frederick Obar, Provincial Director ti Ilocos Norte Police Provincial Office nga awan ti narekobreda a bomba iti uneg ti Mariano Marcos State University – College of Health Sciences iti siudad ti Batac.
Innayonna nga agtultuloy ti imbestigasion ti Anti-Cybercrime Unit tapno maammoan no siasinno ti naggapoanna daytoy bomb threat message.
Maipalagip a nakaawat ti bomb threat ti Mariano Marcos State University iti siudad ti Batac.
Daytoy ket babaen iti naipatulod a mensahe manipud iti maysa a facebook account nga agnagan ti “Dumper Chlo.”
