LAOAG CITY – Naipilan ti kaso a panaglabsing iti Republic Act No. 9165 wenno ti Comprehensive Dangerous Drugs Act of 2002 babaen iti inquest proceedings kontra iti subject iti Anti-Illegal Drug Buy-bust Operation a naiyuswat iti Sitio Maharlika B iti Barangay 1 San Lorenzo ditoy siudad ti Laoag.
Nabigbig ti suspek a ni Jessie Batangan Tadique, agtawen ti 45, awanan asawa, karpintero ken residente iti nadakamat a barangay.
Immuna iti daytoy, naarestar ti suspek kalpasan a naglako ti maysa nga heat-sealed transparent plastic sachet a naglaon ti maipagarup a shabu nga agdagsen ti 0.6 a gramo iti police poseur buyer.
Malaksid iti daytoy, nakumpiskar pay manipud iti suspek ti maysa nga heat sealed transparent plastic sachet a naglaon ti maatap a shabu nga agdagsen ti 0.5 a gramo, pakairamanan dagiti dadduma pay a drug paraphernalia.
Umabot iti P7,480.00 ti balor dagiti naala a maipagarop a shabu nga agdagsen iti 1.1 a gramo manipod iti nasao a suspek.
Naamoan a ni Tadique ket newly Identified iti Drug watchlist iti Philippine National Police ditoy ciudad ti Laoag.
Iti agdama, nagtalinaed ti suspek iti kustodyar ti Philippine National Police bayat a maiyur-uray ti commitment order para iti pannakaipisuk na iti Bureau of Jail Management and Penology ditoy ciudad ti Laoag.
