LAOAG CITY – Maisagsaganan ti kaso a frustrated murder kontra iti suspek ti pammangkog a ni Reynolin Gabug a nakasugatan ti biktima a ni Amado Ballesteros iti Barangay Elizabeth iti ili ti Dingras.
Segun kenni Police Major Ryan Retotar, chief of police ti nasao nga ili, maysa kadagiti kitkitaen da a motibo ket ti panagibales gapo ta ti biktima ket nagbalin a testigo iti pammaltog itay kallabes a nakakunbiktaran ti kabsat ti suspek.
Ummuna iti daytoy, kuna ni Retotar a bayat a gumatgatang ni Ballesteros iti maysa a tianggi ket kellaat lattan a binagkong ni Gabug a nakatamaan ti kannigid a bakrang na.
Inbatad na a kalpasan ti pammangkong ket nagtaray ti suspek tugot na ti kutsilyo ngem babaen ti hot pursuit operation dagiti kameng ti PNP ket naduktalan da nga adda iti Dingras District Hospital.
Saa met pay a makumpirmaran no kasano a nasugatan ti luppo ni Gabug gapo ta basar kenni Retotar ket dagus a naglibas daytoy kalpasan a nabagkong na ti Ballesteros.
Nupay kasta, rumruwmar a basar iti alegasyon ni Gabug ket ummuna a binagkong isuna ni Ballesteros rason a nasugatan ti luppo na.
Iti agdama, agpada a naiyakar ti biktima ken suspek iti Mariano Marcos Memorial Hospital and Medical Center iti ciudad ti Batac manipud iti ospital nga ummuna a nakaitarayan da.
