LAOAG CITY – Manamnama a maipaima kadagiti otoridad iti daytoy nga aldaw ti Lunes, Pebrero 19 ti kopya ti Close Circuit Television camera footage a nakaimuntar iti pasdek nga asideg iti nakaibellengan ti bangkay iti maysa a babai a maladaga.
Daytoy ti inpakaammo ni Police Lieutenant Colonel Adrian Gayuchan ti Hepe iti Philippine National Police iti siudad ti Batac.
Inbatadna a no maduktalan man no asino ti adda iti likudan ti nangibelleng iti bangkay iti maysa a maladaga ket sumango iti kaso a Negligence.
Inlawlawagna a saanna pay a masinunuo no sibibiag pay laeng ti maladaga sakbay a naipan iti eco bag.
Innayonna a malaksid ti maalada a kopya ti Close Circuit Television camera ket nakikoordinarda payen iti ospital tapno mairaman a maimbestigaran dagiti naganak iti nasao nga aldaw.
Maipalagip a nabirukan ti pimmusayen a kaipasngay a maladaga a babai iti uneg ti maysa a bag a naibelleng iti asideg ti terminal ti para Badoc iti paset ti Barangay 17, Tabug iti siudad ti Batac.
