LAOAG CITY – Nabigbigen dagiti otoridad ti maysa nga indibidual a natay gapu iti magnitude 7.4 a gingined iti daya a paset idiay Indonesia wenno asideg iti Ternate island nga agtawen daytoy ti 70 a babai.
Pimmusay ti biktima kalpasan a narpuog ti maysa a pasdek iti Madano City, North Sulawes.
Gapu iti daytoy, naiparuk-at ti tsunami alert ngem saan a nagbayag ket naibabawi met laeng daytoy.
Basar iti United States Geological Survey, ti gingined ket timmama iti Molucca Sea nga asideg ti sentro iti archipelago.
Naammoan a ti epicenter ti gingined ket addaan ti 120 a kilometro manipud iti siudad ti Ternate no sadinno nga adda ti sumurok 205 a ribu a populasion.
Immuna iti daytoy, naiballaag ti posible a pannakaapektar ti tsunami iti uneg ti maysa a ribu a kilometro manipud iti epicenter iti kabaybayan ti pagilian nga Indonesia, Pilipinas ken Malaysia.
