LAOAG CITY – Pimmusayen ti nakamotorsiklo a maysa a menor de edad a nadesgrasia gapu iti maipagarup a panaglilinnumbada iti kalsada iti paset ti bypass road iti Barangay Root iti ili ti Dingras.
Daytoy ti inpakaammo ni P/Maj. Norman Pentang, Hepe ti Dingras Municipal Police Station.
Maipalagip a basar iti Dingras 24/7 Emergency Response Team ket napanda nagresponde iti desgrasia iti agarup 7:30 idi rabii ti Hulio 20 iti nasao a barangay.
Iti pannakisarsaritada kadagiti nakakita iti desgrasia, napukawan ti kontrol ti manibela ti biktima kalpasan a nadalapusna ti nakabunton a darat.
Gapu iti daytoy, nagsagaba ti sugat iti nagduduma a paset ti bagi ti biktima ken nagdara pay ti akinkannigid a lapayagna a naitaray iti Dingras District Hospital ngem naiyakar iti Mariano Marcos Memorial Hospital and Medical Center iti siudad ti Batac.
Mainaig iti daytoy, inlawlawag ni P/Maj. Pentang nga awan ti kumpirmasion no adda ti naiwayat a drag racing iti lugar.
Nupay kasta, kunana a dakkel ti posibilidad a nagturong ti biktima ken ti barkadana iti lugar tapno i-test ti maysa a motorsiklo.
Innayonna nga awan ti protective helmet ti biktima idi napasamak ti insidente.
Kabayatanna, nagpalagip ni P/Maj. Pentang iti panagisuot ti helmet no agiturong ti motorsiklo kas naiyataday iti ordinansa iti ili ti Dingras nangruna ita a panawen ti panagtutudo.
