LAOAG CITY – Agtultuloy ti naiget nga imbestigasyon dagiti kameng ti PNP-Solsona seknan iti pannakapalto-paltog nga isu ti nakatayan ni Eugenio Balantac Jr., agtawen 54, maysa a mannalon ken jeepney operator ken residente iti Barangay Juan iti nasao nga ili.
Segun kenni Police Captain Chris Anthony Sorsano, chief of police ti PNP-Solsona, nagduduma nga anggulo ti kitkitaen na a posible a motibo iti nasao a pammaltog kas iti naibaga ti pamilya ti biktima nga adda ti nakariri na itay kallabes.
Nupay kasta, agpapan kadagitoy ket saan pay a madeterminar dagiti otoridad iti nasao nga ili no adda ti pakainaigan ti riri ti biktima ken ti saan pay a nainaganan nga indibidwal iti nasao a krimen.
Inbatad ni Sorsano nga awan ti witness iti pammaltog isut gapo na a mabalin a marigatan da iti panagimbestigar da.
Kunana nga adda ti tama ti paltog iti tengnged ken abaga ti biktima kalpasan ti pammaltog, ken dagiti suspek ket posible a naglugan ti motorsiklo.
Naamoan a nakarekobre dagiti otoridad ken ti SOCO ti innem nga empty shells iti maipagarop a kalibre 45 a paltog ken tallo a deformed slugs.
Maipalagip a bayat nga agpadaya a direksyon ti biktima iti paset ti Barangay Santiago iti nasao nga ili ken pinalto-paltogan dagiti saan pay a nabigbig a suspek.
