LAOAG CITY – Nagkedked a sumango iti interbiu ni Dr. Norberto Galiza, ti Principal iti Bacarra National Comprehensive High School maipapan iti napasamak a panangkabkabil iti maysa nga estudiante iti nasao a pagadalan.
Daytoy ket kalpasan a pinadas ti News Team ti Bombo Radyo Laoag nga alaen ti takder wenno komento ti maseknan a Principal.
Nupay kasta, bayat ti kaadda ti News Team ti Bombo Radyo Laoag iti ruar ti pagadalan ket saan a napusgan a napastrek daytoy.
Basar iti pannakisarsarita ti News Team ti Bombo Radyo Laoag kadagiti dua a guardia iti nadakamat a pagadalan ket adda ti pammilin kadakuada manipod ken ni Dr. Galiza a saan pay laeng a mangipaay ti reaksion iti napasamak nga insidente.
Maipalagip a nagsagaba ti nakana a sugat iti rupa ti maysa nga agad-adal kalpasan a dinanogdanog daytoy dagiti padana nga estudiante no sadino agkasapulan ti 60 a ribu a pisos para iti pannakaipadalanna ti operasion.
Immuna iti daytoy, kalikagum ni Mr. Wilmer Dela Cruz, ti ama ti estudiante a nadangran a mapaayaban dagiti estudiante a nangkabkabil iti barona ngem no saan dagitoy a dumatag ket dagiti nagannak dagitoy ti mapagsungbat iti nasao nga insidente.
