LAOAG CITY – Umabot iti 117,936 a pisos ti naitaray ti suspek iti maipagarop a robbery incident iti maysa a paggasolinan iti Barangay Naglicuan iti ili ti Pasuquin.
Ummuna iti daytoy, nakaawat ti report ti PNP-Pasuquin idi rabii seknan iti daytoy rason a dagus da a nagresponde.
Basar iti PNP, ti nagbalin a biktima ket ni Desiree Cadiente, agtawen ti 34, awanan ti asawa, cashier iti 67 Gas Station ken residente iti Barangay 32, Corocor iti ili ti Bacarra
Iti palawag ti cashier, bayat nga agtugtugaw ken iyur-uray na ti katrabahoan na ket maipagarop nga adda ti immasideg kenkuana a lalaki a naka-jacket ti agmaris ti asul, naka-short pan ken nakakullong.
Rumrumuar a ditoy nga intutok ti lalaki ti iggem na a kutsilyo iti tengnged ni Cadiente ken inturong na daytoy iti ayan ti kwarta iti nasao a paggasolinaan ken alaen na ti kwarta.
Naamoan a gapo iti panagbuteng ni Cadiente ket dagus na nga inted ti kwarta ken kalpasan daytoy ket insigidad a naglibas ti saan pay a nabigbig a suspek no sadinno ket kimmalay-at ken timmapwak iti inaladan ti gasolinaan.
Mainaig iti daytoy, inbatad ni Police Lt. Floro Cosning, ti Deputy Chief of Police ili ti Pasuquin, agpapan ita ket saan da pay a naestablisar ti katatao ti suspek.
Kabayatanna, kuna ti agtagikua iti gasoline station a ni Mr. Jeffrey Yagyagan, ita ket sagdu-dua pay laeng ti agduty manipud iti innem nga empleado.
Segun kenkuana, iti 7:30 ti rabii ket isu ti panagrikrikep da ken naireport kenkuana ti pasamak iti 7:16 PM ken maysa a gasoline boy ket nakapanawen gapo ta mapan mangala ti arwaten na.
Kunana a saan da pay a nakapa-instular ti CCTV gapo ta manarimaan pay laeng ti panagpa-renovate da iti building da, ken manmanao laeng ti aglabas iti ayan da iti dayta a gundaway.
Inbatad na a sipud 2016 a naglukat ti negosyo na ket daytoy ti kaunaan a gundaway nga adda ti madi a napasamak.
Awan met ti atapen ni Mr. Yagyagan nga akin-aramid iti nasao nga insidente.
