LAOAG CITY – Kinumpirmaran ni Police Chief Master Sergeant Harold Nicolas, mangidadaulo iti Philippine Drug Enforcement Unit (PDEU) ditoy probinsya a narekobren ti van a nagluganan ti lalaki a naglibas kabayatan ti drug buy bust operation iti Barangay 48-A, Cabungaan ditoy ciudad ti Laoag.
Segun kenni Nicolas, nakita ti nasao a van ti paset ti Barangay Samac iti ili ti San Nicolas ngem agtultuloy pay laeng a mabirbirok ti naglibas a ni Jeffrey Aspiras aka “Jeff” a taga ili ti Badoc.
Inbatad ni Nicolas a ti nasao a van ket naabandonar ken nabubuong ti sarming, ado ti tama ti paltog, ken naireport laeng babaen kadagiti nakakita a bumarangay.
Ni Aspiras ket isu ti kadwa ni Victor Garcia y Valbuena alyas “Victor”, 39, awanan asawa ken residente iti Pias Sur ken Gaang iti ili a Currimao kabayatan ti transaksyon.
Inlawlawag ni Nicolas nga idi pay laeng bigat kalman ket addan ti transaksyon da ngem inbatad ni Garcia nga awan kenkuana ti item no diket adda iti kadwa na ken indeliver ni Aspiras rason a naguray da agingga a naisayangkat ti transaksyon idi rabii.
Kunana pay a ni Garcia ken Aspiras ket kabaelan da ti agoperar iti intero a probinsya.
Ummuna iti daytoy, nakita ti agtagikua iti balay a nakaparkingan ti van idi rimwar tapno mapan agala ti nateng nga ilako na rason nga inreport da iti opisyal ti barangay kasta met iti PNP.
Inbatad na pay a ti agtagikua iti van ket kaklase ti anak ti agtagikua iti balay a nakarekobrean ti nasao a behikulo.
Kabayatanna, naipakustudiyar iti PNP-San Nicolas ti nasao a van, ken narekobre iti uneg na ti karton a naglaon ti tallo a sachet ti maipagarop a shabu, dua a sachet a naglaon ti maipagarop a marijuana, ziplock nga addaan ti crystaine substance a saan pay a nadeterminar, green a box a naglaon ti dua a sachet a naggawangan ken remnants ti crystaine substance iti uneg na.
Maipalagip a natiliw ti suspek kalpasan a naglako ti 5 medium sized sachet a naglaon ti maipagarup a shabu nga agdagup iti 5 ribo a pisos iti maysa a police poseur buyer ken kabayatan ti nasao nga operasyon, nadlaw ni Aspiras a maysa a pulis iti katrantransaksyon da rason nga inruar na ti maysa a caliber revolver ken intutok na daytoy ken pinaputok na ngem nakalisi ti police poseur buyer.
Insigida a pinataray ni Aspiras iti MB 100 Van nga addaan iti plate number a WRM 898 ken nagturong iti abagatan a direksyon.
Iti agdama, agtultuloy ti hot pursuit operation dagiti otoridad para iti pannakatiliw kenni Aspiras.
