LAOAG CITY – Nasugatan dagiti uppat nga indibidwal kalpasan ti panagdinnungpar ti maysa a motorsiklo ken maysa a kurong-kurong iti paset ti Brgy. Caraitan, Badoc, Ilocos Norte.
Nabigbig dagitoy a da Alvin Paje y Saludez, 23, maysa a mekanino, driver ti motorsiklo ken residente iti nasao a barangay; Mildred Villa y Vinderlipe, 39, naasawaaan; Jemar Villa y Vinderlipe, 19, ken agtawen ti 14 a menor de edad ken agpapada a residente iti Barangay Labut iti nasa nga ili ken dagitoy ti nakalugan iti kurong-kurong.
Saan met a nasugatan wenno naan-ano ti driver ti kurong-kurong a ni Kevin Villa y Cainglit, 18, awanan ti asawa ken residente met laeng iti Barangay Labut.
Basar iti imbestigasyon ti PNP-Badoc, agpapaabagatan a direksyon ni Paje ken maipagarop nga immagaw iti linya rason a nadungpar na ti kurong-kurong nga agpaamyanan a direksyon.
Gapo iti daytoy, nagsagaba dagiti uppat a biktima ti sugat iti nagduduma a paset ti bagi da.
Naitaray dagiti nakalugan iti kurong-kurong iti Sto. Cristo Milagroso Hosptal idiay Sinait, Ilocos Sur idinto a ni Paje ket naitaray me iti Corpuz Clinic and Hospital para iti pannakataming da.
