LAOAG CITY – Impakaammo ni Mayor Aldrin Garvida ti agdama a situasion ti ili ti Nueva Era iti baet ti mapaspasaran a Habagat.
Kunana a nagkanselar da ti klase kadagiti pagadalan gapu ta kakaasi dagiti ubbing no sumrek dagitoy iti baet ti napigsa a panagtudtudona.
Inbatadna pay a saan a natuloy ti payout dagiti senior citizen gapu ta narisgo daytoy para kadakuada.
Nupay kasta, kunana nga agtultuloy latta ti serrek iti munisipyo da gapu ta ado dagiti agkasapulan nga umili nangruna kadagiti pagopisinaan nga adda pakainaiganna iti mapaspasaran a panagtutudo.
Segun kenkuana, awan met ti nairekord a panaglayos wenno panagreggaay ti daga kasta payen nga awan ti naireport a pannakadadael iti benneg ti agrikultura.
Innayonna a sisasagana ti lokal a gobierno ti Nueva Era nga agresponde wenno mangipaay ti tulong no adda emerhensia wenno agkasapulan.
