LAOAG CITY – Inbutaktak ni Vice President Sara Duterte dagiti rason ti pungtot ken dagiti rakurak na kontra iti administrasyo ni Presidente Ferdinand Marcos Jr.
Segun ken ni Duterte, ti kapungpungtot na iti kallabes ket ti pannakaibabain ti maysa a graduate nga immasideg ken ni Presidente Marcos Jr., karaman ti pannakatay ti miembro ti Kingdom of Jesus Christ (KOJC), panang-tear gas iti daddua a miyembro ti nasao a religious group ken ti maipagarop a pannakadangran dagitoy idi mabirbiruk ni Pastor Apollo Quiboloy idiay Davao.
Iti agdama, ti kapungpungtot na met ket ti panangkamat-kamat da kenkuana ken panangip-ipit kadagiti kakadua na.
Saanen nga innaganan ti bise presidente dagiti dakdakamaten na a kakadwa na, ngem kunana a ti maysa ket agpaspasar ti depresyon, ti maysa ket panpanunuten na ti agpakamatay, maysa ti adda iti ospital ken ti maysa ket saan a makaturturog.
Segun ken ni Duterte, ti poon ken gapu laeng amin dagitoy ket pulitika.
Inpetteng na a sakbay pay a nagsarita ket immunan a perpersonalen da daytoy iti problema a rumbeng nga agpatingga laeng iti pulitika.
Innayon ni Duterte a ti mangperdi iti pagilian ket apal ken imon.
