LAOAG CITY – Target ti Western Visayas a magun-od ti three-peat iti volleyball secondary girls iti Palarong Pambansa 2025.
Segun ken ni Mr. Jose Montalbo, Athletic Manager ti volleyball secondary girls, kalikagumda a saan a maagaw kadakuada ti kampeonato isu nga adda dagiti nagduduma nga estratehia ti inaramid ti grupoda tapno mapagtalinaed ti napintas a rekordda.
Inbatadna a naiget a dimmalan iti panagsanay dagiti amin nga atleta tapno magun-od ti naisangsangayan a balligi ken makaaramid ti pakasaritaan iti tay-ak ti volleyball.
Inlawlawagna a mamati daytoy a saan a nagkurang iti panangisuro ken panangbayabay kadagiti atleta nga iggemna gapu ta makitana met ti improvement ti panagay-ayam dagitoy.
Mainaig iti daytoy, naiget a padpadaanan dagiti agbuybuya ti nalatak a Volleyball Sensation a ni Brianna Nikola Ang manipud iti Western Visayas iti tunggal ay-ayamna iti volleyball.
Maobserbaran nga adda ti mabukel a crowd cheering tunggal mangisayangkat ti volleyball attack ni Brianna.
Inbatad ni Brianna a napigsa ti depensada ken kalikagumda met a mapagtalinaed ti kampeonato dagitoy.
Naammoan a nagbalin a Volleyball Sensation ni Brianna kalpasan a nakibinnalubal iti Western Visayas Regional Athletic Association 2025 idiay Antique.
Kabayatanna, ni Brianna ket middle blocker ti Bacolod Tay Tung High School.
