LAOAG CITY – Natiliw dagiti 10 a lallaki iti insayangkat nga operasyon dagiti kameng ti PNP gapu ti maipagarop a panagar-aramid da iti Improvised explosives a mausar iti illegal a panagkalap iti Brgy. 32 A Lapaz ditoy ciudad ti Laoag.
Nabigbig dagiti suspek a da Joel Asuncion, Dexter Agag, Stimson Agag,Rommel Dela Cruz, Emerson Asuncion, Sherwin Asuncion, Benmjamin Valdez, John Francis diego, Arjay Dumlao ken ni Carmelo Cabacungan.
Naamoan 5 kadagitoy iti residente Brgy. Brgy. 32-A Lapaz ken 5 met dagiti residente iti Brgy. 33-B Gabu ditoy ciudad.
Segun ti PNP, adda ti naawt da nga impormasyon mainaig iti kaadda dagiti agar-aramid ti explosibo iti nasao a lugar.
Dagus a nagresponde dagiti kameng ti pulisya iti lugar a nakaaktwan da a pudno ti naireport kadakuada.
Umabot ti agarop 50 a bote ti nagduduma a size a naaramid nga improvised explosive device wenno pagbong-bong ti nakumpiskar dagiti otoridad manipod kadagiti suspek.
Malaksid kadagitoy, nakakumpiskar pay dagiti otoridad kadagiti paraphelnalia iti panagaramid ti IED kas iti uppat a supot ti potassium, pabelo nga agmaris ti nalabbaga ken daduma pay.
Kabayatanna, inlawlawag ni Benjamin Valdez, maysa kadagiti natiliw nga inaramid da dagitoy tapno adu ti makalapan da .
