LAOAG CITY – Naarestar ti maysa a lakay iti drug buy-bust operation nga insayangkat dagiti kameng ti Provincial Drug Enforcement Unit (PDEU) iti Barangay San Juan iti ili ti Paoay.
Nupay kasta, inpetteng ti suspek a ni Mr. Ariel alyas Boyet Dumlao a saanna a kukua dagiti 12 a sachet a naglaon ti maipagarop a shabu a naala iti ikot na.
Karaman pay a nakumpiskar dagiti kameng ti PDEU ket posporo, nakakaha a sigarilyo, cellphone ken ti sangaribo a pisos a nausar iti operasyon.
Inlawlawag na iti Bombo Radyo Laoag a kabayatan ti panagdaldalos na iti pharmacia ket adda ti nagdamag kenkuana no ania nga oras nga aglukat ti pasdek.
Innayon na a ditoy metten a nagpabigbig a pulis ti nagdamag kenkuana.
Inadmitir ni Dumlao a nagus-usar idi ti illegal a droga ngem nabayagen a panawen gapu ta agtawen pay laeng daytoy idi iti 23 agingga iti 25.
Inpakaammo na a nabalud idin gapu iti naipabasol manen kenkuana nga addaan daytoy iti illegal nga aktibidad ngem napaneknekan nga awan ti basol na.
Kabayatanna, inbatad ni Police Chief Master Sergeant Harold Nicolas, ti mangidadaulo ti PDEU a ti suspek ket datin a nabalbalud iti Muntinlupa wenno makunkuna a repeat offender gapu iti kaso na gapu iti illegal a droga.
Inpakaammo ni Nicolas a ti suspek ket adda iti drug watchlist iti provincial level.
Inlawlawag na a sakbay ti lockdown gapu iti covid-19 ket addan ti agwarwaras a damag nga adda dakkel a droga a simmangpet ditoy probinsya.
Nupay kasta, gapu iti pannakaipatungpal ti Enhanced Community Quarantine (ECQ) ket narigat a makaibunong dagiti maseknan kadagiti target da a lakoan.
