LAOAG CITY – Nauram ti 2 a kadsaaran a pagtaengan iti Brgy. 2 ditoy siudad ti Laoag.
Segun ken ni Mrs. Ligaya Blas, akinkukua ti pagtaengan, saanna pay a masinunuo ti namunganayan ti uram gapu ta nagdardaras daytoy a rimmuar iti balayda.
Inbatadna a gapu ta alisto ti panagramram ti apoy ket awan pulos ti naisalbarda nga aniaman a ramit iti pagtaenganda.
Mainaig iti daytoy, basar iti imbestigasion ti Bureau of Fire Protection ditoy siudad ti Laoag, kaduada a napan nagresponde iti uram ket ti Bureau of Fire Protection iti ili ti Vintar, Bureau of Fire Protection iti ili ti San Nicolas, Fariñas rescue volunteers ken dadduma pay.
Naammoan a dakkelen ti apoy ken napuskol ti asok idi nakasangpetdan iti lugar gapu ta naaramid iti light materials ti pagtaengan.
Kabayatanna, awan ti naipadamag a nadangran iti napasamak nga uram.
Iti agdama, naiget ti isaysayangkat nga imbestigasion dagiti otoridad maipapan iti makaigapu iti uram ken mano ti balor iti naperdi a kagamitan.
