LAOAG CITY – Kinumpirmaran ni Mayor Rafael Ralph Benemerito II iti ili ti Pagudpud a ti dua a Person Under Investigation (PUI) gapu iti covid-19 iti nasao nga ili ket agama.
Inbatad na a ti nasao nga ama ket aggapo idiay Taiwan ken ti anak na ket adda ti sakit na nga asthma.
Inlawlawag na a basar iti report kenkuana, nagpacheck-up dagiti agama iti private clinic ken nagderetso da iti Mariano Marcos Memorial Hospital and Medical Center iti ciudad ti Batac isut gapuna a saan a nairekord iti Municipal Health Office (MHO) da.
Innayon na nga iti agdama ket naka-quarantine dagiti agama iti ospital iti ciudad ti Batac, ken maiyur-uray ti resulta ti pannaka-eksamen da no positibo wenno negatibo da ti covid-19.
Kabayatanna, inpakaammo ti mayor nga addan dagiti immuna a nairekord a PUI iti ili ti Pagudpud ngem negatibo amin dagitoy ti covid-19.
