LAOAG CITY – Umabot iti 23 a tattao ti nasugatan kalpasan a nauram ti dua a gondola ti ferris wheel iti music festival iti asideg ti Leipzig iti daya ti Germany.
Nangrugi ti apoy iti maysa a gondola agingga a nagkayamkam iti maysa pay a nangitunda ti panagpasar ti sugat ti sumagmaman a nakalugan iti ferris wheel.
Basar iti report, adda ti uppat a nakaro ti sinagaba da a sugat idinto nga adda met ti maysa a nasugatan gapu iti pannakatennag na kalpasan iti insidente.
Iti agdama ket agtultuloy paylaeng ti imbestigasyon dagiti otoridad tapno maamoan no ania ti nangitunda iti napasamak nga uram.
