LAOAG CITY – Umabot iti 256 a baby pawikan wenno sea turtles ti naiparuk-at iti taaw.
Daytoy ket nagsina a nawayawayaan iti probinsia ti Quezon ken Batangas.
Iti Brgy. Bignaydos, Sariaya, Quezon, umabot iti 98 a pawikan ti nawayawayaan idinto a 158 iti Brgy. Puting Buhangin iti San Juan, Batangas.
Daytoy a gannuat ket nagtitinulungan ti Coast Guard District Southern Tagalog (CGDSTL), 512th Coast Guard Auxiliary Squadron babaen iti conservation effort ti Coast Guard Station Batangas, Coast Guard District Southern Tagalog Veterinary and Dental Services, Environment and Natural Resources office ti nagduduma a local government unit, ken dagiti lokal a komunidad.
Maibasar kadagiti panagadal, ti Pilipinas ti maysa kadagiti kangrunaan a pagtaengan dagiti pawikan.
Lima kadagiti pito a kita ti pawikan a masarakan iti lubong ket masarakan ditoy pagilian nga amin dagitoy ket agbalbalinen nga endangered wenno mapukpukaw gapu iti nagduduma a rason.
