LAOAG CITY – Manamnama nga adda ti 26 a Pilipino a maibakwit manipod Israel intono weekend gapu iti agtultuloy a tension iti nagbaetan da iti Iran.
Daytoy ti inbatad ni Department of Foreign Affairs Undersecretary Eduardo de Vega.
Segun ken ni de Vega, dagiti nadakamat a Pilipino ket possible a rumuar da iti Israel babaen iti pannagna da iti border crossing nga agturong iti Jordan gapu ta nagtalinaed a suspendido ti flight.
Inpakaammo pay ni de Vega nga adda met ti 17 a Pilipino a manarimaan ti pannakaiproseso ti ipapanaw da iti Iran.
Inadmitir ti Department of Foreign Affairs a narigat ti pannakaipatungpal ti repatriation kadagiti Pilipino nga agkalikagom a pumanaw iti Israel ken Iran gapu ta nasuspenso ti operasyon kadagiti erupuerto.
Immunan a nairakurak nga umaboten iti 150 a Pilipino ti kayatna ti pumanaw iti Israel gapu iti mapaspasamak a riribok iti nagbaetan da iti Iran.
