LAOAG CITY – Inpakaammo ni Mr. Cipriano “Perry” Martinez, ti Acting General Manager ti Ilocos Norte Electric Cooperative a kasapulan ti 3 bilyon a pisos a pundo tapno mapapintas dagiti sistema, substation, wires, transformer iti nasao nga kooperatiba.
Segun kenkuana, daytoy ket kalpasan a masansan iti panagpukaw ti kuryente kadagiti sumagmamano a lugar ditoy probinsia.
Inlawlawagna nga iti panagpukaw ti kuryente ket gapu iti technical problem wenno iti panag-overload dagiti sistema, transformer ken substation.
Kunana a dagiti equipment ti Ilocos Norte Electric Cooperative a mabaybay-an ken saan nga husto iti pannakamentinarna ket mangitunda ti panagpukaw iti serbisio ti kuryente.
Inpalgakna nga iti napalabas nga aldaw wenno idi weekend ket adda dagiti sumagmamano a transformer ti pimmutok.
Innayonna a kasapulan a mapadur-as ti serbisio nga ipaay ti kooperatiba banag nga inpasingkedna nga aramiden nangruna ita a mapaspasaran ti kinabara ti panawen.
Kabayatanna, inaprisiarna dagiti linemen iti panagurnos dagiti linya ti kuryente tapno masigurado a maisubli met laeng a dagus iti suplay ti kuryente.
