LAOAG CITY – Umabot iti 31 a tattao ti natay kalpasan ti iduduprak ti napigsa a bagyo idiay Madagascar.
Immunan a nagdisso iti daga ti Cyclone Gezani iti ciudad ti Toamasina a kangrunaan a pantalan iti isla.
Gapu iti kinapigsa ti bagyo ket naruay dagiti balay a narpuug a nangitunda met ti pannakatay dagiti naruay a residente.
Malaksid iti pannakarpuug ken pannakadadael dagiti ado a balay ket naruay pay a poon ti kayo ti natulid a nakaapektaran ti linya dagiti kuryente a nagresulta met ti panagpukaw ti suplay iti kadakkelan a paset ti Madagascar.
Inrakurak ni military leader Colonel Michael Randrianirina nga arigna 75 a porsiento iti ciudad ti Toamasina ket nadadael gapu iti nasao a bagyo.
