LAOAG CITY – Inpakaammo ni Vice Mayor Carlos Fariñas nga adda ti uppat a tricycle driver ditoy siudad ti Laoag ti natiketan gapu iti nalabes a panagsingir dagitoy iti plete kadagiti pasaheroda.
Inbatadna nga adu dagiti maipadpadanon kenkuana a mensahe gapu iti nalabes a panagsingir dagiti sumagmamano a tricycle driver ditoy siudad.
Inlawlawagna a maiendorso daytoy iti Committee on Transportation tapno ammoen ti plete iti tunggal pagturungan dagiti pasahero ken mamonitor a nasayat dagiti tricycle driver.
Mainaig iti daytoy, kunana nga iti mapaspasamak kadagiti tricycle driver ket agbalbalin nga arkila iti ar-aramidenda kadagiti pasahero nga aglugan kadakuada.
Nupay kasta, binalakadan ni Vice Mayor Fariñas dagiti tricycle driver ken kunana a mabalin a maibabawi dagiti prangkisa dagitoy no agtultuloy a kastoy ti ar-aramidenda kadagiti pasahero a mailuganda.
