LAOAG CITY – Adda ti lima nga indibidual a natay ditoy probinsya ti panangngilin ti semana santa.
Segun ken ni Dr. Rickson Balalio, Provincial Health Officer ditoy probinsya, manipod iti nasao a bilang ket uppat ti nalmes ken maysa ti nagpakamatay.
Inbatad na a dua ti nalmes iti ili ti Pagudpud, maysa iti ili ti Banna ken maysa iti ili ti Marcos idinto a ti nagpakamatay ket taga ditoy siudad ti Laoag.
Inlawlawag na a basar iti insayangkatda a monitoring, adda dagiti napusgan a lifeguard kadagiti lugar a nakapasamakan ti insidente.
Nupay kasta, impalgak ni Balalio a rumrummuar iti imbestigasyon a dagiti biktima ket agpapada a nakainom ti nasanger.
Kabayatanna, inbatad ni Dr. Balalio nga ita a nabara ti panawen ket sigurado nga adu dagiti mapan agdidigos iti baybay ken karayan, ngem masapol a liklikan ti agbartek wenno uminom ti arak no mapan tumappog iti danom.
