LAOAG CITY – Manamnama a mangisayangkat ti baro a military exercise ti pagilian a pakipagpasetan dagiti soldado manipud iti Estados Unidos, Japan, South Korea, United Kingdom, ken Australia.
Daytoy ket maawagan kas “Kaagapay ng Mga Mandirigma ng Dagat (KAMANDAG) 08 – 24 nga exercises” a maangay inton Oktubre 15-25.
Segun iti Philippine Marine Corps (PMC), makibinnulig iti military exercise ti US Marine Corps, Japan Ground Self-Defense Force, Republic of Korea Marine Corps, United Kingdom Royal Marine Commandos, ken Australian Defence Force.
Ti Kamandag Exercise ket paset dagiti aktibidad ita a tawen iti nagbaetan ti Pilipinas ken Estados Unidos nga immuna nga inaprobaran ti Mutual Defence Board – Security Exchange Board a buklen dagiti opisial ti Pilipinas ken US security officials.
Sumagmamano kadagiti lugar a pakaisayangkatan ti military exercise ket iti Northern Luzon Command, Western Command Joint Operational Areas, ken sumagmamano a napili a lugar iti Manila ken Cavite.
Iti agdama, saan pay a nairuar ti Armed Forces of the Philippines ti dagup a bilang dagiti soldado a makipaset.
Karaman kadagiti panagsanay ken simulation a maaramid ket live fire, amphibious assault, raid, counter-landing exercises, humanitarian assistance ken disaster relief, ken dadduma pay.
