LAOAG CITY – Nabagkong dagiti 13 nga indibidual pakairamanan ti 9 a bulan pay laeng a maladaga iti maysa a shopping centre idiay Sydney, Australia.
Segun ken ni Bombo International News Correspondent Denmark Suede manipod idiay Australia, daytoy ket kalpasan nga adda ti maysa a lalaki a suspek a mapattapatta nga agtawen ti 40 a simrek iti shopping centre a kellaat a nangbagkong kadagiti makitana ken makasinnabatna iti shopping centre.
Inbatadna a kadagupan kadagiti 13 a biktima ti pammagkong ket 5 ditoy ket dead on the spot idinto a dagiti 8 ket naitaray iti kaasitgan nga ospital ngem naideklara a pimmusay ti maysa kadakuada nga isu ti ina ti 9 a bulan a maladaga.
Kunana nga awan met pay ti inruar nga impormasion dagiti otoridad ti pakabigbigan dagiti maseknan a biktima pakairamanan ti suspek.
Inlawlawagna a gapu iti multiple stabbing incident ket agtalinaed pay laeng a nakarikep ti nasao a shopping centre bayat nga agtaltaledted ti maisaysayangkat nga imbestigasion.
Innayonna a saan pay a masinunuo dagiti otoridad no daytoy ket terrorist attack wenno mental health problem ti nangitunda ti nasao a krimen.
