LAOAG CITY – Dumanon iti 9 a pamilia ti nagtalinaed kadagiti evacuation center ditoy probinsia gapu iti epekto ti Bagyo Carina.
Segun ken ni Mr. Marcell Tabije, mangidadaulo ti Provincial Disaster Risk Reduction and Management Office, dagiti maseknan a pamilia ket manipud iti Brgy. Catagtaguen iti ili ti Banna, Brgy. 7B ken Brgy. 32-C Lapaz ditoy siudad ti Laoag.
Inbatadna a no maipanggep iti imprastraktura ket nadadael ti slope protection iti San Mateo Bridge ditoy siudad ti Laoag a nangitunda ti panag-alternate ti panagdalyasat dagiti motorista iti lugar.
Mainaig iti daytoy, inpakaammo ni Mrs. Rochelle Gajes, mangidadaulo ti Provincial Social Welfare Development Office a nakasagana dagiti relief goods a mabalin a maibunong kadagiti umili a maapektaran iti mapaspasaran a Bagyo Carina.
Inlawlawagna a ti linaon dagiti relief goods ket tallo a kilo ti bagas, canned goods, energy drink, noodles ken miki.
Kunana nga iti agdama ket adda ti sumurok dua a ribu nga available a family food packs iti opisinada.
Kabayatanna, inbatad ni Engr. Maria Teresa Bacnat, mangidadaulo ti Provincial Agriculture Office nga iti agdama ket awan ti nairekord nga agricultural damages ditoy probinsia gubuay iti Bagyo Carina ngem agtultuloy ti panangmonitorda maipapan iti daytoy.
