LAOAG CITY – Inbatad ni Doctor Norman Rabago, ti Covid-19 consultant ditoy probinsya nga adda ti 2,340 doses a Pfizer vaccines ti simmangpet ditoy Ilocos Norte.
Inlawlawag na a ti nasao a bakuna ket nagbibingayan iti Lokal a Gobierno iti ili ti Dingras, Mariano Marcos Memorial Hospital and Medical Center iti ciudad ti Batac ken ti Karmeli Clinic and Hospital.
Inbatad na a ti nasao a bakuna ket maited kadagiti resipiyente manipod iti A1, A2 ken A3 Group.
Segun ken ni Rabago, dagiti karaman kadagiti nadakamat a grupo ket dagiti health care workers, frontliners, Senior citizens ken dagiti nataengan nga addaan ti sagsagabaen a nakana sakit.
Kuna ni Doctor Rabago a masapol a maitudok dagiti nasao a bakuna iti uneg ti lima nga aldaw mairaman ti pannakaibiyahe na tapno saan a maperdi.
Innayon na a mabalin laeng a mabakunaan dagiti resipiente ti Pfizer vaccines iti maikadwa a dose kalpasan ti 21 nga aldaw.
Inpalagip na a no astrazeneca ti naitudok iti umuna a dose ket aguray pay laeng iti 10-12 a lawas sakbay a mabakunaan iti maikadwa a dose idinto a 28 nga aldaw ti palabsen no ti naibakuna ket sinovac vaccine.
