LAOAG CITY – Nangbukel ti quad committee ti Sang Panlungsod ditoy ciudad ti Laoag tapno duktalen ti sungbat dagiti nagduduma a saludsod a maidandanon kadakwada maipaggep iti panagfiesta ditoy ciudad.
Segun iti maysa a kameng ti konseho, adda dagiti agdamdamag no adda ti napasamak a bidding iti peryaan wenno carnival ditoy ciudad.
Kunana nga adda ti naipasa nga ordinansa ditoy ciudad a mangmanmandar nga adda ti maiwayat a bidding process iti carnival tunggal ag-fiesta ditoy ciudad.
Mainaig iti daytoy, kuna ti opisyal a mapan da kuma iti mismo a carnival tapno saludsoden daytoy ngem nakigtot da gapo ta sumagmamano kadagiti rides ket awanen idinto a saan pay a nalpas ti fiesta.
Mainaig iti daytoy, kunana a basar iti pannakisarsarita da kadagiti dadduma a kameng ti carnival ket resulta daytoy it pannakatiliw da gapo iti drop ball iti kallabes.
Malaksid iti daytoy, kalikagum pay ti quad committee nga amwen no adda ti kinapudno na nga adda dagiti agsingsingir ti renta kadagiti Micro, Small & Medium Enterprises nga adda iti Aurora park ken kalsada nga aglaklako.
Inpetteng ti Sang Panlungsod a ti panaglako dagiti maseknan iti nadakamat a lugar ket libre ken awan ti rumbeng a bayadan da.
Ti quad committee ket bukbuklen ti Committee on Games and Amusement, Committee on Tourism, Committee on Laws, ken Committee on Ways and Means.
