LAOAG CITY – Balligi a naarestar ti maysa a Mechanical Engineer babaen ti naiwayat a Search Operation iti Barangay 61 Cataban ditoy siudad ti Laoag.
Ti subject ti operasion ket agtawen ti 43 ken residente iti nasao met laeng a barangay.
Basar iti Laoag City Police Station, kabayatan ti panangiwayatda ti Search Operation ket nabirokan dagiti otoridad ti calibre 45 nga addaan ti pito a bala iti sirok ti kama iti kuarto ti suspek.
Malaksid iti daytoy, naala pay dagiti otoridad ti 42 a bala ti calibre 45 a paltog ken maysa a 9mm a pistol iti uneg met laeng iti kuarto ti suspek pakairamanan dagiti sumagmamano nga empty shells a nasarakan iti cabinet.
Kabayatanna, inpetteng ti inhinyero a naimula laeng dagiti nabirokan nga ebidensia kontra kenkuana.
Iti agdama, manamnama a sumango iti kaso gapu iti panaglabsing iti Republic Act No. 10591 wenno ti Comprehensive Firearms and Ammunition Regulation Act ti suspek.
