LAOAG CITY – Kalikagum ti chairman ti Committee on Tourism ti Sang Panlungsod a maduktalan dagiti agsingsingir ti bayad kadagiti aglaklako iti Aurora Park.
Daytoy ket kalpasan nga adda dagiti maibagbaga a maipagarup nga adda dagiti agkolkolektar iti bayad kadagiti aglaklako iti nadakamat a parke.
Kuna ti chairman ti komite nga awan iti aniaman a masingir a renta dagiti maseknan gapu ta libre iti panaglako wenno panagpwesto da iti Aurora Park.
Inpetteng na iti panangtutuk da iti daytoy nga isyu tapno saan a masayang dagiti kwarta dagiti aglaklako nga ibaybayad da iti siasino man nga agsingsingir kadakuada.
Maipalagip a dagiti aglaklako iti Aurora Park ket dagiti babassit a negosiante wenno dagiti maibilang a Micro Small and Medium Entrepreneurs isut gapuna a libre daytoy nga ididiaya ti lokal a gobierno ditoy siudad ti Laoag.
