LAOAG CITY – Inpakaammo ni Engr. Shiela Opelac, mangidadaulo ti City Agriculture Office ditoy ciudad ti Laoag a plano da iti mangestablisar iti maysa pay a farm tourism ditoy ciudad.
Daytoy ket kalpasan a pimmatok iti publiko ti Todomax Flower Garden and Vegetable Garden a masarakan iti Brgy. 29 Sto Tomas ditoy ciudad.
Segun ken Opelac, addan ti kinasaritada a maysa a barangay ditoy ciudad a pakaestablisaran iti maysa pay a vegetable garden and flowering garden.
Kunana nga iti umay a lawas ket manamnama ti panagturong dagiti sumagmamano nga opisial wenno operators ti farm tourism idiay General Santos para iti National Convention.
Kuna ni Opelac a babaen iti daytoy a seminar ket isu iti pakakitaan kadagiti baro nga ideya no ania pay ti mabalin nga aramiden tapno ad-adda pay a mapapintas iti farm tourism ditoy ciudad.
Maipalagip a ti Todomax garden and flower garden ket nalukatan laeng itay kallabes iti publiko, ken agpapan ita ket awan pay ti naiyetnag nga entrance fee.
Naammoan nga agarup 3,000 square meters ti kalawa ti nakaimulaan dagiti nagduduma a klase ti nateng ken sabsabong.
