LAOAG CITY – Kumpiansa ti Philippine Statistics Authority a mabalin a mapaginad ti inflation iti baboy iti kanito a matuloy ti panangikeddeng ti Maximum Suggested Retail Price wenno MSRP iti karne ti baboy.
Immunan nga inbatad ti Department of Agriculture a daytoy nga addang ket gagem a maipababa ti presio ti karne ti baboy kadagiti tiendaan ditoy pagilian.
Basar iti datos ti Philippine Statistics Authority, dumanon iti 12.1 percent idi Pebrero ti inflation iti baboy.
Agay-ayam met iti P322.45 ti presio ti pork kasim iti napalabas a bulan.
Inlawlawag ni Philippine Statistics Authority Deputy National Statistician Assistant Secretary Divina Grace Del Prado, makaapektar ti Maximum Suggested Retail Price iti karne ti baboy iti garaw ti presio daytoy.
