LAOAG CITY – Namnamaen ti lokal a gobierno iti ili ti Sarrat a makatulong dagiti nagduduma a proyekto iti agrikultura tapno matulongan dagiti mannalon iti panawen ti kalgaw.
Segun iti mayor iti nasao nga ili, manarimaan ti pannaka-establisar ti solar irrigation system iti Brgy. 17 iti ili ti Sarrat a naiyalokaran ti pondo a 15-milyon a pisos.
Inbatad na a ti nasao a programa ket pakabenepisyaran ti 20 nga ektarya a kataltalonan iti nadakamat a barangay a nakaimulaan dagiti high value crops.
Innayon na nga iti agdama ket dandanin makompleto ti proyekto no sadinno a naangay payen ti initial testing.
Inpakaammo pay ti local chief executive nga adda pay ti sumaruno a maestablisar a solar power irrigation nga agbalor ti 35-milyon a pisos iti metlaeng nadakamat a barangay, malaksid iti maaramid iti Barangay 18 iti nadakamat nga ili.
Inpanamnama na a kadagiti sumarsaruno a bulan ita a tawen ket mausar ton dagitoy a proyekto para iti pagsayaatan dagiti umili.
