LAOAG CITY – Maisayangkat ti maikadua a bansada ti Summer Reading Program wenno SRP babaen ti Ilocos Norte Provincial Library.
Segun ken ni Mr. Eric Coloma, Provincial Librarian, gapu ta asidegen ti bakasion dagiti agad-adal nangrugidan a nagparehistro kadagiti interesado a makipaset iti daytoy a programa nga agpatingga inton Abril 13.
Inbatadna a dagiti mabalin a makipartisipar iti daytoy a programa ket dagiti nagannak pakairamanan dagiti annakda nga agtawen ti tallo agingga iti 16.
Inlawlawagna a dagiti ubbing nga agtawen ti tallo agingga iti 12 ket masapul a kuyugen dagiti nagannak kadakuada.
Kunana a mabalin dagiti maseknan ti agpili ti basaenda a libro wenno e-book iti uneg ti 30 a minuto iti kada aldaw iti Library wenno iti pagtaengan dagitoy iti uneg ti uppat a lawas.
Innayonna a masapul nga irekord dagiti maseknan ti oras ti panagbasada iti reading log kalpasan ti panagbasada gapu ta dagiti makakumpleto iti programa ket maipaayan ti award kas panangbigbig ti Provincial Government of Ilocos Norte iti aktibo a pannakipasetda iti programa.
Naamoan a naikeddeng a mangrugi ti nasao a programa inton Abril 14 agingga inton Mayo 20, manipud iti Lunes agingga iti Biernes.
Kabayatanna, daytoy a programa ket paset ti kalikagum ti gobierno probinsial a nasapa a maipasagepsep kadagiti ubbing ti kinapateg ti panagbasa ti libro.
