LAOAG CITY – Inlawlawag ni Ilocos Norte Electric Cooperative Acting General Manager Mr. Perry Martinez no apay nga inpasardeng da ti panagoperar ti traffic light iti Gilbert Bridge ditoy ciudad ti Laoag.
Segun kenkuana, illegal ti pannakaikonektar ti traffic light gapu ta saan a nagaplikar ti lokal a gobierno ditoy ciudad.
Kunana a masapol nga agaplikar ti gobierno lokal iti kooperatiba tapno maamoan nu kasano ti kaado ti makonsumo na a kuryente ken maikkan ti bukod a kontador.
Innayon na nga idi mangrugi nga agoperar ti nasao a traffic light ket inkonektar da iti feeder a mangsupsupplay iti SM Laoag ken kadagiti pagtaengan iti Barangay Nangalisan A ken B nga addaan laeng ti 4 Mega Watts.
Inbatad na a no saan a makita daytoy sakbay nga agusarda ti kuryente manipod kooperatiba ket possible a mangitunda ti problema kadagiti pagtaengan.
Nupay kasta, inaprisyar ni Martinez ti lokal a gobierno gapu ta kalpasan a naipakaammo kadakwada daytoy ket insigida a rinugyanan da ti nagaplikar.
