LAOAG CITY – Nagballaag ni Dr. Rodrigo Catcatan, mangidadaulo ti City Health Office ditoy siudad ti Laoag kadagiti umili maipanggep iti kinabara ti panawen.
Segun kenkuana, no awan laketdi ti nasisita a papanan ket agtalinaed lattan iti pagtaengan tapno makaliklik iti aniaman nga itunda iti napudot a paniempo.
Inbatadna a kasapulan iti panangtagiben iti salun-at aglalo kadagitoy gapu iti napalalo a bara iti aglawlaw.
Malaksid iti daytoy, inpakaammona nga inaldaw a naruay dagiti agturturong iti opisinada tapno agpacheck-up gapu iti epekto iti kinabara ti panawen.
Innayonna a dagiti kangrunaan nga agpakpakonsultar ket dagiti ubbing nga aggurigor, agpanateng, skin diseases ken dadduma pay.
Kabayatanna, kuna ni Dr. Catcatan nga ipaayanda met dagitoy ti libre nga agas ken awan ti nairekord a na-heatstroke gapu iti kinabara ti panawen.
