LAOAG CITY – Inaprobaran ti konseho ti resolusyon a mangipaay ti oportunidad iti Department of Education ditoy ciudad ti Laoag a mangadaptar iti kanta a napaulwan “GLOWING BRIGHT” official hymn ti nasao nga ahensiya.
Nupay kasta, kiniddaw ti konseho a mangaramid da iti maysa pay a bersyon a ti maaramat a lengwahe ket Filipino wenno Iloco, nga inanamongan met ti Department of Education.
Inbatad ti konseho a babaen ti panagusar iti Filipino wenno Iloco ket maipakita ti panangitandudo ti kinatao dagiti estudyante kasta met ti kultura ken tradisyon ti naggapwan da.
Segun kenni Miss Lourdes Arucan, ti chief Education Supervisor, mangallukoy danto manen kadagiti writers ken singers a makisalip iti kompetisyon a buwangayen da tapno agaramid ti Department of Education hymn babaen iti panagusar ti filipino wenno iloco.
Innayon na a daytoy ket kantaen da kabayatan ti flag raising ceremony iti Departmen of Education ditoy ciudad ti Laoag, kasta pay kadagiti aktibidad ken programa nga organisaren da.
Kunana nga iti agdama ket ti paylaeng usaren da ket ti Glowing Bright kabayatan ti panangiyur-uray da ti baro a kanta a pagbalinen da nga hymn.
